अनिश्चितकालीन आम हड्ताल हिजोदेखि फिर्ता लिएको छ । अध्यक्ष पुष्पकमल दाहालको निवासमा हिजो साँझ बसेको स्थायी समितिको बैठकले हड्ताल 'स्थगित' गर्ने निर्णय गरेको हो । बैठकपछि सञ्चारकर्मीहरुसित बोल्दै दाहालले भने- 'बन्दमा जनताले पाएको दुःख र दुःखको नाजायज फाइदा उठाउँदै जनताविरुद्ध जनतालाई भिडाउने वर्तमान गठबन्धन सरकारले षड्यन्त्र गरेका कारण हाललाई बन्द स्थगित गरिएको हो ।'
विराटनगर,जनकपुर,बीरगंज,चितवन,पोखरा र कंचनपुर लगायतका सहरहरुको जनजीवन पूर्ववत संचालनमा आएको त्यहाँ स्थित कान्तिपुर संवाददाताहरुले जनाएका छन् । बजार,यातायात संचालनमा आएको छ । शनिबार परेका कारण शैक्षिक संस्था र सरकारी कार्यालय संचलानमा आएको छैन । बीरगंजमा शान्ति र सहमतिको दवाब दिंदै उद्योग वाणिज्य संघ र विभिन्न पेसागत संगठनको आव्हानमा शान्ति र्याली गरिएको छ । त्यस्तै प्रकृतिको र्याली र सभा माओवादी दवाबका कारण चितवनमा स्थगित भएको छ ।
बैठकले आम हड्तालमा साथ दिएकोमा जनतालाई धन्यवाद दिएको छ । आन्दोलनको कार्यक्रम फिर्ता भने नलिइएको उनले बताए । भोलि माओवादीले राजधानी लगायत विभिन्न जिल्लामा र्याली गर्ने र २ बजे र्याली सभामा परिणत गर्ने निर्णय भएको दाहालले बताए।
उनले पर्सि राजधानीमा सिंहदरबार घेर्ने र जिल्लामा सदरमुकाममा प्रशासन कार्यालय घेर्ने कार्यक्रम तय गर्ने निर्णय भएको पनि उनले जानकारी दिए । पर्सिपछिको कार्यक्रम भने स्थायी समितिको बैठक बसी तय गरिने जानकारी दिइएको छ । जेठ १४ अघि नै अर्को आन्दोलन गर्ने निर्णय पनि माओवादीले गरेको छ ।
No comments:
Post a Comment